Selamat Nai Meno' blog e'.

Selamat pegita ka-ang ilu Oko, Amai, We', Seken, Sadin, anak ngan Toyang alai layan, oban sokat nai meno' blog e' liwai ji. Ading-ading ake' ti tega tawai oban oba' nai naat kise' dau senorat e' ngan pepo pekimet ngan ne' dalem blog e' ji. Blog e' ji un kado' naen bahagian keneng poyan udip de' lapa, naat ne dau kidi ngan bada' boka un dau tira' de' sala' neng idi ngan kua' kua' pilu peteneng udip tega ka-ang ilu serepe' apan. Nyiau udip alai layan apan boka le tai petego' ca liwai laa limun kanan.

Tega Tawai.

Amaitebun

Jumaat, Oktober 10, 2014

Tana’ Asen Kenyah Badeng.

Un atek asen lepo’ ilu Kenyah Badeng, tana’ asen le jane Dataran Tinggi Usun Apau abe’ Apau Kayan. Dalem asat buau mengikut dau serita kelunan lata’, ida mudip berabad-abad kaeng daleh ji ne. Un tepo-o, tana’ Usun Apau jane tana’ je’ atek bio’ lan ngan un pedau Penan mudip ngan re ka dalau ja re.
Badeng buau cen Long Badeng oban ida kelapa kapan’ ale’ ngan nta ne dau tana’ oma re sukup.

Long Badeng baen dau de’ Lata’ bada’ jane ca sangat sungai dalem Alo Iwan. Un Alo Iwan la’a sangat sungai Alo Kayan. Juko’ re tai buau ka’ Usun Apau kira-kira penghujung oman 1700an ngan awal oman 1800an. Kado’ dau tai tat asi re un ka’ Usun Apau, uko’ baen Lidung Jelo, Lg Petan, Long Ta’a ngan de’ ca la’a. Kenyah Badeng Usun Apau tai buau ka’ Apau Kayan(beh te’ Indonesia) jane sio’ oman 1907.

Tading lepo’ ilu mudip ka’ Usun Apau, ke’ Ka Laeh dau re ngelepo’ ngan Toa re dalau ja jane Paran Anye’. Beng dua oman ledau re mudip ka oja tai re buau ka’ Long Ampan Aing (Usun Apau).  Tai kado’ ne dau re ngan tana’ pe co’ tai nao’ ka’ Long Ampan Aing oja ida tai ka Lolau Mabo (Usun Apau). Toa re ka jane Papui Anye’(sadin Paran Anye’).

Petat lepo cen ja laa ja tai re ka’ Leteng Peliran(Usun Apau). Palai tai ka’ Long Pampong(Usun Apau), oja Long Setung (Usun Apau) ngan Long Ca’(Usun Apau). Un pe palai tai ka’ Long Ta-a.
Sua’ oban Tekuang Tasek redo Lumai Bilong ponan sa-ang tana’ oma, ja ngkin Lumai Bilong tai ngan palai Badeng tai buau ka long Bau(Indonesia). Ida ne de’ du nak Badeng Bau.

Dalau Badeng mudip ka’ Lidung Jelo (lepo’ bio’), un Rajah Brooke nak bawa ke’ Usun Apau oban re nai bawa lepo’ Lanan sua’ oban du mabang ida ka’ Sawa’ Latai. Meka pe ida nta bayan pupu ngan nta oba’ ngening dau perintah mengin ida ngenyeng perintah. Nta dau ayau jadi nai nyelat Badeng kapan ka’ Lidung jelo oban belau letak ka’ aba’ lepo’ bio’. Ule’ cen ja ne ayau. Lepo’ iut Badeng tua’ le sio’ ka’ Long Ca’, Long Ta-a ngan Long Petan. Lepo’ de’ ca de’ sio’ dalau ja jane Lepo’ tau ka’ Penyoen, Lepo’ Timai ngan Uma’ Kelep.

Lepa Rajah Brooke nak bawa (Ayau Iting) ke’ Usun Apau, oja du oyan aman ka’ Belaga. Nta le tisen eh-e’ wakil lepo’ ilu nai dalau ja re. Un lebih kurang 100 oman lepo’ ilu mudip ka’ Usun Apau(cen kena pemerintahan Rajah Brooke pabe’ Badeng panyie tuen Aut nta oba’ tai buau ka’ Long Mujan ngenyeng pasen Marudi) .Oban Badeng malai mudip ka ulu sungai ngan mita tana’ tiga, juko’ re kelap cen Usun Apau tai ka’ Apau Kayan (Long Boi) pemung ngan Lepo’ Tau. Un Kayan, buau palai me ida cen Apau Kayan nai ngan de’ senganak ka’ Alo Baliu. Un pe palai lepo’ Kayan tetap mudip ka’ Alo Kayan.